TÀRDE NUÈSTRE – SAN SEVERO = 1 A 1…’NA CÁPE DE CHIÀNDE E ‘NA VÈNDRE DE MACCARRÚNE!

La colorita analisi del match del nostro grande Aldo Salamino

Spàcco qquà! Spacco llà!... Ije so’ ‘u mègghie!... Accóme a mméje no’ne stònne!...Maiùùùùùùùùùùùùù! Ce fegúre da niènde ca hè fàtte! Avíva spaccà ‘u mùnne! ‘A príma vóte no’ng’hè vulúte avenè! Po’, il socio forte (accóme all’acíte) e ‘u Presedènde t’hònne venúte a pigghià fa ca tànne n’avíva fa’ vedè accóme se sciòche ô pallóne! Apprìsse all’amìche túe, ‘u Direttóre sportíve, avíte scettáte a mmáre ‘na squàdra ggià fàtte e ‘nu sbuènne de uagnúne aggarbáte pe’ scè catta’ le mègghie sciucature d’u mùnneeee (‘a vede’ tu)! Indr’alle Cidià (C.D.A.), ci no’ vutáve a MAIURI e  a DE SOLDA venéve pigghiáte a pernàcchie. E moooooooooo’? Addò avíta scappa’? Cèrte, se po’ sbaglià! Ma ‘a cóse ca no’nge me scènne de ‘stu MAIURI jè una sulamènde; Ha sciúte sèmbre decènne, quànne ‘a squàdre perdéve, ca éve còlpa sóje e po’ ce ffá?e? No’nge se demètte! Aspètte ca ‘u càccene! Ma ce cristiáne si? Mah! Nnànze a’lle sòlde ‘a dignità se ve’ scètte a mmáre! Le sòlde fànne vene’ ‘a vìste a’lle cecáte! Òsce, ‘a squàdre ha ffàtte n’òtre de chìdde sue capolavóre de tècneche e de tàtteche. Ha sciucáte c’u 5-0- 5…cóme ògn’e vvóte! Quèdda cápa tòste ha sciúte a mèttere n’òtra vóte BALISTRERI e CIARCIA’ ,ca hònne fàtte chiàngere, e ha tenúte fóre: MOLINARI (ca ha trasúte ô secònde tièmbe e ha segnáte) e CICCIO MIGNOGNA. Ma ce avíte fermáte quàlche ccàrte segréte ca hònne sciuca’ pe’ ffòrze ‘ste cristiáne? Mah! Misteri…di Mister! Comùngue ‘a còlpe jè d’a società! NISCIUNE ESCLUSE! S’hònne fàtte ‘mbrusa’ n’òtra vóte! Spàcco qquà! Spàcco llà! Ma ce spàcche e spàcche? A qquà ‘na cóse sóle n’avíte spaccáte!...’Nu salúte tarandíne da Catàvete Salamíne! Ànneseeee!