TÀRDE NUÈSTRE – TURRIS = 0 A 2…HA CANGIÁTE ‘U MÈSTRE E ‘A MÒSECHE NO’ JÉ CCHIU’ BBÓNE!

Amaro ma...estremamente divertente il commento a tinte vernacolari del grande Aldo!

Ma ce šckife!... Àme fàtte, áme fàtte e no’nge áme fàtte ‘nu…..decíme nìnde. Díce ca teníme ‘nu squadróne! Ma a ddò? Teníme tànda sciucatúre bbuéne, síne, ma ‘na squàdre vére e pròprie nóne! Àme vulúte a MAIURI, fa ca mo’ jéve ‘u mègghie allenatóre d’u mùnne, áme scuasciáte tùtte cóse, trattáte a pìsce ‘mbàcce ‘nu signóre allenatóre accóme a PETTINICCHIO; Cidià d’aqquà, Cidià d’addà e stáme pùnde e a ccápe! Ósce n’áme fàtte mèttere mmiènze d’a TURRIS. Le corallíne n’hònne fàtte a bbróde! Cèrte ca teníme ‘na defése ca vulèssene accíse. MARCHITELLI, VISCUSO. Pe’ nno’ parla’ d’u cendrocàmbeeeee! I gemelli del cendrocàmbo: MUWANA e CARLOTO no’ sso’ capáce de fa parte’ ‘n’azzióne. Nemmànghe a pajàrle. Jè ppúre vére ca n’hònne annulláte ‘nu páre de gol e c’áme pigghiáte ‘na travèrse c’u CLEMENTE ma no’nge áme vìste sciuèche pròprieeeee! E quìdde VIVACQUA? Ce l’ha mmíse a ffa’? Ma no’ jéve mègghie MIGONI, ca po’ ha trasúte indr’o secònde tièmbe? A ‘nu cèrte pùnde hònne trasúte púre CICCIOMIGNO’ e ANCORA, ma no’ ha sciúte bbóne accóme ‘a vóta passáte! PROSPERI s’ha mangiáte ‘nu gol fàtte pròprie ll’ùrteme d’a partíte. Mah!.... Paréve pròprie ca le sciucatúre d’u Tàrde Nuèstre no’ sse putèvene vede’ úne cu ll’òtre òsce…sarà ‘n’imbressióne ma accussì paréve. Beh! ‘Nu salute tarandíne da Catàvete Salamíne…e FORZA TÀRDE NUÈSTRE!