BISCEGLIE – TÀRDE NUÈSTRE = 3 A 3…AVAST! ACCATTÁTEVE L’ANTIVIRUS!

La cronaca di Bisceglie - Taranto... rivista in chiave dialettale da Aldo Salamino

Mezza squàdre d’u Tàrde Nuèstre ha státe ‘mbestáte da ‘u Coratovirus. Ehehe! Jè vére ca le baríse so’ infettíve, ma accussì brùtte no’nge penzáve! Eheheheh! ‘U Tàrde Nuèstre ha sciúte ô ritíre a Corato appùnde, e indr’a menèstre l’hònne míse ‘u virus. Tùtte a  cacarèlle hònne sciúte le sciucatúre nuèstre. Ce no zzùmbe téne ‘u virus cantàvene. Hehehe! Comungue, virus a pàrte, hònne fàtte ‘na partíte ca vulèvene essere accíse. ‘A defése s’avéve addurmesciúte brùtte! PROSPERI e cumbàgne avèvene chiatráte. ‘Nu regóre còndre, n’autogol, n’òtre gol in condropiéde… e ce jéve l’armáte Brangaleone? Menumále ca teníme CLEMENTE, CICCIOMIGNO’, ANCORA ca hònne addrezzáte ‘u vascìdde ca ce no’, mazzáte da’lle baríse pigghiàmme òsce!... P’u Bisceglie ha segnate ‘nu pàre de gol CROCE. Averamènde ‘na cróce ha státe òsceeeeee! ‘Na cróce amáre! Cèrte ca quànne MAIURI ha fàtte trase’ a CICCIO MIGNOGNA ha cangiáte ‘a partíte! Appríme ha dìtte a CLEMENTE: M’ha fa’ bàttere ‘na punizzióne? E mmeeeeeeeeeee’!...CLEMENTE no’nge vuléve, ma CICCE s’ha mmíse accóme ‘na sanguètte e ha segnáteeeeeeee! Po’ ha pigghiáte ‘a squàdre e se l’ha carisciáte sús’ a’lle spàlle! Ha fàtte segna’ púre a ANCORA…l’ancora de salvèzze.Ehehehe! Uagnu’…ma ce ccóse avíte decíse? N’avíte fa avene’ ‘u mal de córe? Presede’! Dase ca hè cattáte ‘nu sbuènne de sciucatúre, víde ce accàtte púre n’antivirus…ne ste’ úne  ca téne ‘nu nóme tarandíne e jé bbuéne còndre a’lle baríse. Se chiáme AVAST!... E avàste mo’! Sce’ curcàmene! E Menumále accóme n’ha sciúte!... ‘Nu salúte tarandíne da Catàvete Salamíne!