PÀSS’A MME, CA SO’ VELÓCE! / TÀRDE NUÈSTRE - ALTAMURA = 1 A 0…’U CÁNE AŠQUATE TĖNE PAÚRE DE L’ÀCQUA FRĖDDE!

e ce vóle dìcere? Ca quànne ‘u cáne s’ašquate cu l’àcqua càvete se pìgghie paúre púre quànne l’àcque jè frèdde. Mado’! Ma RAGNO e tòtt’a squàdre stàvene pròprie paúre-paúre. Ajére dópe ca hònne fàtte ‘u gol s’a ste facèvene sòtte. Ha segnáte MANZO, Stèfene nóne Luìgge. Luìgge ha státe squalificáte. Ca núje teníme do’ manze, ‘nu ràgne e ‘nu rìcce. Avíme fàtte ‘a vècchia fattòrije! Comùngue, ‘u vulíte lassa’ mbáce a Ragno? E cce cóse! Dùmeneche stáve in tribúne púre mister BITETTO, ca ste’ facéve ‘a malaùrije, piccè ce ‘u Tàrde nuèstre perdéve, jìdde pigghiáve ‘u pòste de Ràgne. Uè Bitettooooo! Vìde ce te ste’ a ccása tóje e jàcchiete ‘na fatìje. Dàtele ‘u rèddite de cittadinànze! Lassàtule fatia’ a mister Ragno ca quìdde sápe ‘u fàtte sue! GIOVE tenéve ‘a lúna stòrte, menumále ca áme vengiúteeeeeeeee!

‘Nu salúte tarandíne da Catávete Salamíne e sèmbre forza Tàrde nuèstre!... Facítava cala’!